Bill Geyts vəzifəsi ilə vidalaşdı. Məşhur “Microsoft” korporasiyasının rəhbəri, dünyanın ən zəngin adamlarından biri olan Bill Geyts “SES-2008" yüksək texnologiyalar sərgisində proqram nitqi ilə çıxış edib. Son dəfə geniş ictimaiyyət qarşısında məruzə etdiyini vurğulayan B.Geytsin dediyinə görə, iyul ayında ”Microsoft" rəhbəri səlahiyyətlərinin bir qismindən imtina edərək yaratdığı xeyriyyə fondunun fəaliyyətinə daha çox diqqət vermək niyyətindədir.

“Səlahiyyətlərimin bir parasından imtina etdiyim gün 17 yaşımdan bəri ilk gün olacaq ki, ”Microsoft"un tam səlahiyyətli əməkdaşı olmayacağam. Rəhbər qismində son günümün necə keçəcəyini hələ bilmirəm. Bilirsinizmi, bu, bir qədər qəribədir. Siz son gününüzdə nə edərdiniz?"- deyə B.Geyts ABŞ-ın Nevada ştatındakı Las-Veqas şəhərində keçirilən sərgidəki nitqində söyləyib.

Qərb mediasının “Geytsin qu quşu mahnısı” adlandırdığı çıxışında “Microsoft” rəhbəri bildirib ki, bəşəriyyət birinci rəqəmsal onilliyi uğurla başa vurub: “İndi ikinci onilliyin başlandığını bəyan edirəm”. Milyarder həmçinin bildirib ki, o, yaxın zamanlarda klaviaturasız və “siçansız” yeni kompyuter texnologiyasını hazırlayacaq". Geyts onu da bildirib ki, ən azı iki il ərzində insan hissiyyatı ilə hərəkətə gələcək kompyuterlərin də istehsalına başlayacaq.